Parlamenti Evropian miraton rezolutën që thotë se gratë trans janë gra
Parlamenti Evropian ka miratuar një rezolutë që njeh gratë trans si gra brenda kornizës së politikës së BE-së për barazinë gjinore.
Rezoluta e 11 shkurtit kishte për qëllim miratimin e rekomandimeve për prioritetet e Bashkimit Evropian për sesionin e 70-të të Komisionit të OKB-së për Statusin e Grave, i cili do të mbahet muajin e ardhshëm në Nju Jork. Komisioni i OKB-së për Statusin e Grave është përgjegjës për promovimin e barazisë gjinore në mbarë botën.
Ndër rekomandimet ishte një shpallje që theksonte “rëndësinë e njohjes së plotë të grave trans si gra, duke vënë në dukje se përfshirja e tyre është thelbësore për efektivitetin e çdo politike për barazinë gjinore dhe kundër dhunës”.
Sipas LGBTQ Nation, Rezoluta përmendi gjithashtu personat LGBTI+ në disa pjesë të tjera, përfshirë deklaratën mbi nevojën për një “mjet gjithëpërfshirës për të monitoruar dhe kundërshtuar prapambetjen demokratike dhe prapambetjen në të drejtat e grave” dhe duke cituar “sulmet nga lëvizjet antigjinore dhe anti- të drejta” që “minojnë demokracinë dhe targetojnë të drejtat e grave dhe LGBTIQ+.”
Seksioni mbi prerjet e fondeve për organizatat joqeveritare përfshinte “organizatat LGBTIQ+” si të nevojshme për mbështetje. Seksioni mbi shëndetin seksual dhe riprodhues përmendte “qasje në shërbime të kujdesit mendor të ndjeshëm ndaj gjinisë për vajzat dhe personat LGBTIQ+.”
Rezoluta u miratua me 340 vota pro, 141 kundër dhe 68 abstenime.
Raporti më i gjerë trajton tema të tilla si: qasja në drejtësi për gratë dhe vajzat, dhuna me bazë gjinore, diskriminimi struktural, diferenca në paga midis gjinive dhe shëndeti dhe të drejtat riprodhuese.
Çka ndodh tutje?
Rezoluta do të ndikojë në pozicionin e Bashkimit Evropian në Komisionin e OKB-së për Statusin e Grave në mars. Ndërsa rekomandimi i Parlamentit nuk krijon ligj në vetvete, ai tregon se si BE-ja mund të angazhohet në negociata dhe diskutime në nivel ndërkombëtar.
Vota pasqyron diskutimet globale që vazhdojnë mbi mënyrën se si trajtohet identiteti gjinor në ligj dhe politika, veçanërisht në çështje që lidhen me qasjen në hapësira vetëm për gra dhe mbrojtjet kundër dhunës.
Ndërsa rekomandimet e Parlamentit Evropian nuk janë ligjërisht të detyrueshme për shtetet anëtare të Bashkimit Evropian, priten të kenë ndikim të konsiderueshëm mbi pozicionet e BE-së në këtë forum.
