Lihtenshtajni legalizon martesat e të njëjtit seks
Një fitore e rëndësishme për dylberat e Lihtenshtajnit! Parlamenti në kombin evropian – votoi me 24 vota pro 1 kundër në mbështetje të barazisë martesore, raportoi gazeta lokale Liechtensteiner Vaterland.
Lihtenshtajni është bërë vendi i fundit gjerman folës që legalizoi martesat e të njëjtit seks me një vendim pothuajse unanim.
Mbështetja e vendit për të drejtat e martesave LGBTQ+ vjen nga vlerat e barabarta martesore të Gjermanisë, Austrisë dhe Zvicrës, që kanë legalizuar martesat e të njëjtit seks në vitet 2017, 2019 dhe 2022.
Qeveria e Lihtenshtajnit fillimisht miratoi projektligjin për të drejtat e martesës mes të njëjtit seks më 8 mars të këtij viti, ndërsa leximi përfundimtar u zhvillua më 16 maj në mbështetje të projektligjit. Amendamenti i ligjit për martesën pritet të hyjë në fuqi më 1 janar 2025.
Duke folur për TVO, zëdhënësi i Partisë së Qytetarëve Progresivë në Lihtenshtajn, Daniel Seger e quajti ndryshimin e amandamentit të ligjit të martesës një “lehtësim të madh”.
“Ne e kemi ndjerë presionin dhe pritshmërinë se ne duhet të jemi vendi i fundit gjerman folës që do të prezantojë martesën për të gjithë,” tha ai.
Llogaria zyrtare X (ish Twitter) e Misionit të Përhershëm të Lihtenshtajnit në OKB u shfaq në platformën e mediave sociale më 17 maj për të ndarë lajmin, duke e quajtur atë “një hap të rëndësishëm për të drejtat e barabarta të personave LGBTIQ+ në Lihtenshtajn!”
Vendi alpin, me një popullsi prej pak më shumë se 39,000 (sipas të dhënave të vitit 2022), fillimisht bëri të mundur që çiftet e të njëjtit seks të regjistrojnë partneritete ligjore në vitin 2011, duke u lejuar atyre disa nga të drejtat e njëjta si çiftet heteroseksuale. Vendi mikpriti Paradën e parë të Krenarisë në 2022.
Lihtenshtajni i bashkohet vendeve evropiane që mbështesin të drejtat LGBTQ+ në 2024, duke përfshirë legjislacionin e Greqisë për martesat dhe birësimin për çiftet e të njëjtit seks në shkurt, dhe Republikën Çeke që zgjeron bashkimin e saj në ligj për çiftet e të njëjtit seks në prill.
Artikulli u publikua në The PinkNews dhe u përkthye nga Dylberizm.
