Kili miraton martesën e të njëjtit seks me një shumicë dërrmuese
Kili miratoi të martën legjislacionin për barazinë martesore në një votim dërrmues, pas katër vitesh mosveprim.
Të dy dhomat e Kongresit të Kilit autorizuan masën me shumicë dërrmuese, duke e bërë atë shtetin e tetë të Amerikës Latine që lejon martesat e të njëjtit seks, si dhe të 31-in në mbarë botën.
Presidenti Sebastián Piñera, i cili është gati të largohet nga detyra në mars, e kundërshtoi legjislacionin për vite me radhë. Por vetëm gjashtë muaj më parë, lideri konservator tregoi se ai kishte ndryshuar qëndrimin e tij për këtë çështje duke i hapur rrugën Kongresit për të vepruar. Ai pritet ta nënshkruajë atë në ligj.
“Unë mendoj se ka ardhur koha për t’u garantuar atë liri dhe atë dinjitet të gjithë njerëzve,” tha Piñera në një fjalim vjetor në Kongres më 1 qershor.
“Mendoj se ka ardhur koha për barazi në martesë në vendin tonë”, shtoi ai.
Ligjet ekzistuese lejojnë çiftet gej të bashkohen sipas një Pakti të Bashkimit Civil, i cili u miratua në 2015 dhe u jep çifteve të drejta të njëjta si të martuarit, por u mohon atyre të drejtën për të birësuar.
Ligji i ri do të zgjerojë të drejtat e plota prindërore për prindërit e të njëjtit seks dhe do të zgjerojë përfitimet bashkëshortore dhe të drejtat e birësimit për çiftet e martuara të të njëjtit seks.
Ndryshimi publik i mendjes së Piñera-s shkaktoi shtytjen e përshpejtuar të fundit të projektligjit përmes legjislaturës, pasi u anashkalua në të dy dhomat e Kongresit për katër vjet. Projektligji u prezantua për herë të parë në 2017 nga presidentja e atëhershme Michelle Bachelet.
Aktivistët e të drejtave të njeriut kaluan më shumë se një dekadë duke bërë fushatë për ndryshimin, duke përfshirë organizatën MOVILH, një nga mbështetësit kryesorë të projektligjit.
“Pas shekujsh abuzimi”, tha grupi i të drejtave LGBTQ+ në një postim në Twitter, “dyert e drejtësisë, barazisë dhe dinjitetit janë hapur për çiftet e të njëjtit seks”.
Vendimi vjen më pak se dy javë përpara zgjedhjeve në vend- një balotazh- në të cilin kilianët duhet të vendosin nëse do të zëvendësojnë Piñerën me populistin e ekstremit të djathtë Jose Antonio Kast ose Gabriel Boric, një ish-udhëheqës i ri studentor i majtë.
Të martën Kast, një katolik që nuk mbështet martesën gej dhe ka kundërshtuar masën në të kaluarën, zbuloi se ai do ta kishte nënshkruar ligjin gjithsesi nëse do të kishte qenë president, raportoi Reuters.
