Gjykata e BE-së: ligji anti-LGBTQ+ i Hungarisë është diskriminues dhe shkelë të drejtat themelore
Gjykata e Drejtësisë së Bashkimit Evropian ka konstatuar se ligji hungarez i vitit 2021 që kufizon përmbajtjet për personat LGBTQ+ është diskriminues, stigmatizues dhe në kundërshtim me vlerat themelore të BE-së. Vendimi e cilëson ligjin si të papajtueshëm me një shoqëri të bazuar në pluralizëm, barazi dhe liri të shprehjes.
Ligji, i miratuar nën qeverinë e Viktor Orbán, ndalon paraqitjen e temave LGBTQ+ në shkolla dhe kufizon transmetimin e përmbajtjeve të tilla në media para orës 22:00. Sipas Gjykatës, këto masa trajtojnë personat LGBTQ+ si kërcënim dhe përbëjnë forma të qarta dhe të rënda diskriminimi, duke cenuar dinjitetin njerëzor dhe të drejtat themelore.
Vendimi shënon një precedent, pasi është hera e parë që Gjykata konstaton shkelje të ligjit të BE-së nga një shtet anëtar mbi bazën e vlerave themelore të përcaktuara në nenin 2 të traktatit, përfshirë demokracinë, barazinë dhe mbrojtjen e të drejtave të pakicave. Gjykata theksoi gjithashtu se Hungaria nuk mund të përdorë “identitetin kombëtar” si arsyetim për ligje që bien ndesh me këto parime.
Përveç kësaj, u konstatuan edhe shkelje të rregullave për mbrojtjen e të dhënave, për shkak të zgjerimit të aksesit në të dhëna penale në emër të “mbrojtjes së fëmijëve”. Gjykata kërkoi që Hungaria ta zbatojë vendimin pa vonesë dhe të mbulojë kostot e procesit gjyqësor.
Vendimi vjen në një moment tranzicioni politik në Hungari, pasi Péter Magyar ka fituar zgjedhjet e fundit, por mbetet e paqartë nëse qeveria e re do të tërheqë politikat anti-LGBTQ+ të viteve të fundit.
