Me 5 qershor mbahet Parada e dhjetë e Krenarisë në Prishtinë
Këtë vit, Muaji i Krenarisë vjen me një peshë të veçantë. Nga 1 deri më 6 qershor, Java e Krenarisë 2026 shënon një dekadë të Paradës së Krenarisë në Prishtinë, që kulmon më 5 qershor nën sloganin “Barazi ose Revoltë!”.
Lajmi është bërë i ditur nga Prishtina Pride, e cila organizohet nga organizatat CEL Kosova dhe CSGD, në bashkëpunim me YIHR Kosova, Qendra Kosovare për Studime Gjinore dhe Civil Rights Defenders.
“Nga 1 deri më 6 qershor 2026, hapësirat publike të Prishtinës do të mbushen sërish me ngjyrat e lirisë. Ky moment shënon më shumë se një festë, është një kujtesë e forcës, rezistencës dhe komunitetit që e kanë mbajtur Krenarinë gjallë për një dekadë. Bashkohuni me ne për të festuar historinë tonë dhe për të vazhduar marshin drejt të ardhmes që meritojmë”, thuhet në deklaratën e Prishtina Pride.
Këtë vit, Parada e Krenarisë, e paralajmëruar fillimisht për të shtunën në mbrëmje, tani do të zhvillohet të premten më 5 qershor. Tubimi fillon te Sheshi Skënderbeu nga ora 12:00.
Orari i Paradës është ndryshuar për shkak të zhvillimeve politike dhe mbajtjes së zgjedhjeve, të cilat kanë krijuar rrethana që detyrojnë riorganizimin e tërë planit fillestar.
“Në një vend ku ciklet zgjedhore përsëriten më shpesh se përkushtimi ndaj të drejtave themelore, ne detyrohemi të riorganizojmë hapësirën tonë për të ekzistuar. Ndërkohë që energjia shoqërore konsumohet nga kriza të njëpasnjëshme politike, të drejtat tona vazhdojnë të shtyhen, të relativizohen, të harrohen” thuhet në deklaratën e Prishtina Pride.
Në ditët në vazhdim pritet të publikohen më shumë detaje për koncertin, aktivitetet dhe programin e plotë të Javës së Krenarisë 2026.
Slogani i këtij viti nuk vjen rastësisht. Ai flet për përditshmërinë e personave LGBTIQ+, për sigurinë që mungon, për strehimin, për njohjen e identitetit dhe të partneriteteve, për shërbimet bazë që shpesh nuk ekzistojnë, për dhunën që vazhdon edhe brenda familjes.
“Ky nuk është vetëm slogan, ky është realiteti ynë. Java e Krenarisë, në dhjetëvjetorin e saj, nuk bën më asnjë kompromis”, shkruhet ne deklaratën e Prishtina Pride.
Në këtë frymë, organizatorët ftojnë të gjithë të bashkohen për të qëndruar bashkë në një kohë që kërkon më shumë zë, më shumë kujdes dhe më shumë guxim.
