Mali i Zi bën histori me martesën e parë të të njëjtit seks
Martesa e parë e të njëjtit seks në Malin e Zi u regjistrua të dielën në qytetin bregdetar të Budvës, një vit pasi Mali i Zi u bë vendi i parë në Ballkan jashtë BE-së, që legalizoi partneritetet civile të të njëjtit seks, raporton BIRN.
Një zyrtare komunale në Budva, Milijana Vukotic Jelusic, tha se martesa ishte midis dy grave të reja, të dyja nga jashtë por me origjinë malazeze.
“Ne jemi të kënaqur që komuna jonë ishte në gjendje të jetë e para që zbatoi Ligjin për Partneritetin e Jetës dhe ne u dëshirojmë lumturi dhe shumë dashuri partnerëve në jetën e tyre së bashku”, tha Jelusic për gazetën e përditshme Vijesti.
Në korrik 2020, parlamenti në Mal të Zi votoi për legalizimin e partneriteteve civile të të njëjtit seks me një shumicë shumë të ngushtë të deputetëve nga Partia Demokratike e Socialistëve në pushtet, DPS, Social Demokratët, Partia Liberale dhe Partia Social Demokrate në opozitë.
Ndryshimi u mbështet nga vetëm 42 deputetë në dhomën me 81 vende.
Sipas ligjit, qeveria kishte një afat prej 15 korrikut të këtij viti për të harmonizuar kornizën legjislative me ligjin e ri nën të cilin çiftet e të njëjtit seks mund të hyjnë në një bashkim ligjor në zyrën e tyre lokale të regjistrit.
Ligji lejon gjithashtu rregullimin e mbështetjes së ndërsjellë financiare dhe ndarjen e pasurisë së përbashkët në rast divorci. Ai u jep atyre që janë në një partneritet civil të të njëjtit seks, të drejtën për sigurim shoqëror dhe mbulim shëndetësor bazuar në partnerin e tyre dhe rregullon vizitat familjare në spitale ose burgje, mirëpo nuk siguron të drejtën për birësim ose edukim të fëmijëve.
Ministrja e Administratës Publike, Shoqërisë Dixhitale dhe Medias, Tamara Srzentic, të dielën e quajti martesën e parë të të njëjtit seks në vend një hap historik.
“Edhe pse ligji u miratua një vit më parë, duhet të bëhet shumë më tepër për të përmbushur të gjitha parakushtet për zbatimin e tij të plotë. Komuniteti LGBTIQ do të ketë gjithmonë një aleat në mua për të gjitha aktivitetet që kontribuojnë në përmirësimin e cilësisë së jetës së tyre, “tha Srzentic.
Përkundër këtyre fjalëve mbështetëse, homoseksualiteti mbetet një çështje e ndjeshme në vendin ende konservator, siç kudo tjetër në Ballkan.
Sondazhet e mëparshme sugjeruan që 71 përqind e qytetarëve në Malin e Zi e shikonin homoseksualitetin si një sëmundje dhe se çdo qytetar i dytë e shikonte atë si një rrezik për shoqërinë dhe dëshironte që shteti ta shtypte atë.
Mali i Zi dështoi dy herë më parë për të njohur bashkimet e të njëjtit seks – në 2014 dhe 2019. Kur ia doli në korrik 2020, u bë e vetmja ish-republikë ish-Jugosllave jashtë BE-së që e bëri këtë, megjithëse Serbia ka një legjislacion të ngjashëm në plan.
Nga republikat e tjera ish-Jugosllave në rajon, anëtarët e BE-së Kroacia dhe Sllovenia kanë legalizuar partneritetet e të njëjtit seks.